29. Дараа өдөр нь Иохан өөр уруу нь ирж яваа Есүсийг хараад—Ертөнцийн нүглийг үүрэгч Бурханы Хургыг харагтун!
30. Энэ бол Түүний тухай “Миний араас ирэх Хүн миний тэргүүн байсан. Яагаад гэвэл Тэр надаас урьд оршин байсан” гэж миний хэлсэн Тэр мөн.
31. Би Түүнийг таниагүй. Гэвч Тэр Израильд илчлэгдсэн байхын тулд би усаар баптисм хүртээхээр ирсэн гэв.
32. Иохан гэрчилж—Сүнс тэнгэрээс тагтаа мэт буун ирж, Түүн дээр тогтохыг би харсан.
33. Би Түүнийг таниагүй. Харин усаар баптисм хүртээлгэхээр намайг илгээсэн Тэр “Хэний дээр Сүнс тагтаа мэт буун ирж тогтохыг чи харна, Тэр бол Сүнсээр баптисм хүртээгч мөн” гэж надад айлдсан юм.
34. Би харсан. Энэ бол Бурханы Хүү мөн гэдгийг би гэрчилж байна гэж хэлэв.
35. Дараа өдөр нь Иохан хоёр шавьтайгаа дахиад л зогсож байлаа.
36. Есүсийн явж байхыг тэр хараад—Бурханы Хургыг харагтун! гэсэнд
37. хоёр шавь нь түүний хэлэхийг сонсоод Есүсийг дагав.
38. Есүс эргэж тэдний дагаж байгааг хараад тэднээс—Та нар юу эрнэ вэ? гэж асуусанд, тэд Түүнд—Рабби (орчуулбал Багш аа), Та хаана буудаллаж байна вэ? гэв.
39. Есүс тэдэнд—Ир, та нар харна гэж айлдсанд тэд Түүний буудаллаж байгаа газарт очиж үзээд, тэр өдөр Түүнтэй хамт буудаллав. Учир нь тэгэхэд ойролцоогоор аравдугаар цаг болж байлаа.
40. Иоханы хэлснийг сонсоод Есүсийг дагасан хоёрын нэг нь Симон Петрийн дүү Андрей байжээ.
41. Андрей эхлээд өөрийн ах Симоныг олоод, түүнд—Бид Мессиаг (грекээр Христ) оллоо гээд,
42. түүнийг Есүс уруу авчрав. Есүс түүн уруу хараад, Симонд—Чи бол Иоханы хүү Симон байна. Чамайг Кеф (грекээр Петр) гэж нэрлэх болно гэлээ.
43. Дараа өдөр нь Есүс Галил уруу явахаар завдан байхдаа Филипийг олоод, түүнд—Намайг дага гэв.
44. Филип Андрей, Симон нарын хот болох Бетсайдаас иржээ.
45. Филип Натанаелыг олоод—Бид Мосегийн Хуульдаа бичсэн болон эш үзүүлэгчдийн бичсэн тэр хүн болох Иосефын хүү, Назарын Есүсийг оллоо гэсэнд,
46. Натанаел түүнд—Назараас ямар нэгэн сайн юм гарч чадна гэж үү? гэхэд, Филип—Ирж, хар л даа гэв.
47. Есүс Өөр уруу нь ирж яваа Натанаелыг хараад, түүний тухай—Дотроо заль мэхгүй, жинхэнэ Израиль хүнийг харагтун гэж айлдав.