8. Mahatsiaro ny fanekeny mandrakizay Izy, Dia ilay teny izay voadidiny ho an'ny taranaka arivo mandimby,
9. Eny, ilay nataony tamin'i Abrahama, Sy ny fianianany tamin'Isaka;
10. Izay naoriny ho lalana ho an'i Jakoba, Sy ho fanekena mandrakizay ho an'Isiraely,
11. Ka nataony hoe: Homeko anao ny tany Kanana, Ho lovanareo voazara amin'ny famolaina,
12. Fony mbola olom-bitsy izy, Eny, vitsy sady vahiny tao,
13. Ary nifindrafindra tany amin'ny firenena, Sy nifindrafindra fanjakana ho amin'ny firenen-kafa,
14. Tsy nisy navelany hampahory azy, Ary nananatra mpanjaka Izy noho ny amin'ireo hoe:
15. Aza manendry ireo voahosotro, Ary aza manisy ratsy ireo mpaminaniko.
16. Dia niantso ny mosary ho amin'ny tany Izy; Notapahiny avokoa ny mofo rehetra, izay tohan'aina;
17. Naniraka lehilahy hialoha azy Izy; Josefa namidy ho andevo;
18. Nampijaliny tamin'ny fatorana ny tongony; Nogadrany vy izy.
19. Mandra-pahatongan'ny fotoana hahatanterahan'ny teniny; Nizaha toetra azy ny tenin'i Jehovah.
20. Naniraka ny mpanjaka hamaha azy, Eny, ny mpanapaka ny vahoaka, mba handefa azy.
21. Nanao azy ho tompon'ny tranony izy Sy ho mpanapaka ny fananany rehetra,
22. Mba hamatotra ny mpanapaka araka ny sitrapony, Sy hampianatra fahendrena ny loholony.
23. Ary Isiraely nankany Egypta; Eny, Jakoba nivahiny tany amin'ny tanin'i Hama.
24. Dia nahamaro ny taranaky ny olony ho be indrindra Izy ka nampahery azy noho ny fahavalony.
25. Nampiova ny fon'ireny hankahala ny olony Izy Sy hihendry ny mpanompony.