11. Ingressus itaque salutavit eum, et dixit : Gaudium tibi sit semper.
12. Et ait Tobias : Quale gaudium mihi erit, qui in tenebris sedeo, et lumen cæli non video ?
13. Cui ait juvenis : Forti animo esto : in proximo est ut a Deo cureris.
14. Dixit itaque illi Tobias : Numquid poteris perducere filium meum ad Gabelum in Rages civitatem Medorum ? et cum redieris, restituam tibi mercedem tuam.
15. Et dixit ei angelus : Ego ducam, et reducam eum ad te.
16. Cui Tobias respondit : Rogo te, indica mihi de qua domo aut de qua tribu es tu.