1. In diebus autem illis venit Joannes Baptista prædicans in deserto Judææ,
2. et dicens : Pœnitentiam agite : appropinquavit enim regnum cælorum.
3. Hic est enim, qui dictus est per Isaiam prophetam dicentem : Vox clamantis in deserto :Parate viam Domini ;rectas facite semitas ejus.
4. Ipse autem Joannes habebat vestimentum de pilis camelorum, et zonam pelliceam circa lumbos suos : esca autem ejus erat locustæ, et mel silvestre.
5. Tunc exibat ad eum Jerosolyma, et omnis Judæa, et omnis regio circa Jordanem ;
6. et baptizabantur ab eo in Jordane, confitentes peccata sua.
7. Videns autem multos pharisæorum, et sadducæorum, venientes ad baptismum suum, dixit eis : Progenies viperarum, quis demonstravit vobis fugere a ventura ira ?
8. Facite ergo fructum dignum pœnitentiæ.