7. Et duxerunt pullum ad Jesum : et imponunt illi vestimenta sua, et sedit super eum.
8. Multi autem vestimenta sua straverunt in via : alii autem frondes cædebant de arboribus, et sternebant in via.
9. Et qui præibant, et qui sequebantur, clamabant, dicentes : Hosanna : benedictus qui venit in nomine Domini :
10. benedictum quod venit regnum patris nostri David : hosanna in excelsis.
11. Et introivit Jerosolymam in templum : et circumspectis omnibus, cum jam vespera esset hora, exiit in Bethaniam cum duodecim.