8. Et erit quasi lignum quod transplantatur super aquas,quod ad humorem mittit radices suas,et non timebit cum venerit æstus :et erit folium ejus viride,et in tempore siccitatis non erit sollicitum,nec aliquando desinet facere fructum.
9. Pravum est cor omnium, et inscrutabile :quis cognoscet illud ?
10. Ego Dominus scrutans cor,et probans renes :qui do unicuique juxta viam suam,et juxta fructum adinventionum suarum.
11. Perdix fovit quæ non peperit :fecit divitias, et non in judicio :in dimidio dierum suorum derelinquet eas,et in novissimo suo erit insipiens.
12. Solium gloriæ altitudinis a principio,locus sanctificationis nostræ.
13. Exspectatio Israël, Domine,omnes qui te derelinquunt confundentur :recedentes a te, in terra scribentur,quoniam dereliquerunt venam aquarum viventium Dominum.
14. Sana me, Domine, et sanabor :salvum me fac, et salvus ero :quoniam laus mea tu es.
15. Ecce ipsi dicunt ad me :Ubi est verbum Domini ? veniat :
16. et ego non sum turbatus, te pastorem sequens :et diem hominis non desideravi, tu scis :quod egressum est de labiis meis, rectum in conspectu tuo fuit.
17. Non sis tu mihi formidini :spes mea tu in die afflictionis.
18. Confundantur qui me persequuntur,et non confundar ego :paveant illi,et non paveam ego :induc super eos diem afflictionis,et duplici contritione contere eos.