25. Sapientia scribæ in tempore vacuitatis,et qui minoratur actu sapientiam percipiet,qua sapientia replebitur.
26. Qui tenet aratrum,et qui gloriatur in jaculo, stimulo boves agitat,et conversatur in operibus eorum,et enarratio ejus in filiis taurorum.
27. Cor suum dabit ad versandos sulcos,et vigilia ejus in sagina vaccarum.
28. Sic omnis faber et architectus,qui noctem tamquam diem transigit :qui sculpit signacula sculptilia,et assiduitas ejus variat picturam :cor suum dabit in similitudinem picturæ,et vigilia sua perficiet opus.
29. Sic faber ferrarius sedens juxta incudem,et considerans opus ferri :vapor ignis uret carnes ejus,et in calore fornacis concertatur.
30. Vox mallei innovat aurem ejus,et contra similitudinem vasis oculus ejus.
31. Cor suum dabit in consummationem operum,et vigilia sua ornabit in perfectionem.
32. Sic figulus sedens ad opus suum,convertens pedibus suis rotam,qui in sollicitudine positus est semper propter opus suum,et in numero est omnis operatio ejus.
33. In brachio suo formabit lutum,et ante pedes suos curvabit virtutem suam.
34. Cor suum dabit ut consummet linitionem,et vigilia sua mundabit fornacem.