1. សេចក្ដីប្រកាសស្ដីអំពីស្រុកបាប៊ីឡូន ដែលលោកអេសាយជាកូនរបស់លោកអម៉ូស បានឃើញក្នុងនិមិត្តដ៏អស្ចារ្យ:
2. «ចូរលើកទង់សញ្ញាមួយនៅលើភ្នំមួយដែលគ្មានដើមឈើចូរនាំគ្នាស្រែក និងបក់ដៃហៅពួកទាហានទាំងនោះឲ្យចូលមកតាមទ្វារកិត្តិយស។
3. យើងបានចេញបញ្ជាទៅកាន់អស់អ្នកដែលប្រគល់ជីវិតមកយើងគឺហៅអ្នកចំបាំងដ៏ជំនាញទាំងនោះមកដើម្បីប្រើពួកគេឲ្យសម្រេចតាមកំហឹងរបស់យើងពួកគេនឹងមានអំណរសប្បាយដោយយើងមានជ័យជំនះ»។
4. ចូរស្ដាប់ស្នូរសន្ធឹកដ៏គគ្រឹកគគ្រេងនៅតាមភ្នំដូចសំឡេងមហាជនយ៉ាងច្រើនកុះករគឺជាសំឡេងរបស់ប្រជាជាតិនៃរាជាណាចក្រជាច្រើនឥតគណនាដែលមកជួបជុំគ្នា។ ព្រះអម្ចាស់នៃពិភពទាំងមូលត្រួតពលដែលត្រៀមខ្លួនទៅច្បាំង។
5. អ្នកទាំងនោះមកពីស្រុកឆ្ងាយៗគឺមកពីជើងមេឃ ព្រះអម្ចាស់នឹងប្រើពួកគេដើម្បីសម្រេចតាមព្រះពិរោធរបស់ព្រះអង្គនិងបំផ្លាញស្រុកនោះទាំងមូល។
6. ចូរនាំគ្នាស្រែកទ្រហោយំដ្បិតថ្ងៃរបស់ព្រះអម្ចាស់មកជិតបង្កើយហើយ។នៅថ្ងៃនោះ ព្រះដ៏ខ្ពង់ខ្ពស់បំផុតនឹងធ្វើឲ្យកើតមហន្តរាយ។
7. ហេតុនេះហើយបានជាមនុស្សគ្រប់ៗគ្នាបាក់ទឹកចិត្ត លែងមានសេចក្ដីក្លាហាន។
8. ពួកគេនឹងភ័យតក់ស្លុត ឈឺចុកចាប់ រមួលខ្លួនដូចស្ត្រីដែលកំពុងតែសម្រាលកូន។ពួកគេមើលមុខគ្នាទៅវិញទៅមកទាំងស្រឡាំងកាំង ហើយមុខរបស់គេពោរពេញទៅដោយភាពអាម៉ាស់។
9. មើល៍ ថ្ងៃនៃព្រះអម្ចាស់មកដល់ហើយគឺជាថ្ងៃមួយដ៏សាហាវជាថ្ងៃដែលមនុស្សត្រូវទទួលទោសស្របតាមព្រះពិរោធដ៏ខ្លាំងបំផុត។ថ្ងៃនោះនឹងធ្វើឲ្យផែនដីក្លាយទៅជាទីស្មសានដ៏ស្ងាត់ជ្រងំមនុស្សបាបទាំងអស់នឹងវិនាសសូន្យ។