58. ព្រះអម្ចាស់នៃពិភពទាំងមូលមានព្រះបន្ទូលថា៖«កំពែងដ៏ស្កឹមស្កៃរបស់ក្រុងបាប៊ីឡូនបាក់បែករហូតដល់គ្រឹះទ្វារដ៏ខ្ពស់ៗក៏ឆេះអស់គឺស្នាដៃដែលប្រជាជនទាំងឡាយបានធ្វើក្លាយជាអសារបង់អ្វីៗដែលប្រជាជាតិនានាខំប្រឹងធ្វើក្លាយទៅជាចំណីភ្លើង»។
59. នេះជាសេចក្ដីដែលព្យាការីយេរេមាបង្គាប់ដល់លោកសេរ៉ាយ៉ា ជាកូនរបស់លោកនេរីយ៉ា និងជាចៅរបស់លោកម៉ាសេយ៉ា នៅពេលដែលគាត់ទៅស្រុកបាប៊ីឡូន ជាមួយព្រះបាទសេដេគា នៅឆ្នាំទីបួន ក្នុងរជ្ជកាលរបស់ស្ដេចនេះ។ កាលនោះ លោកសេរ៉ាយ៉ាមានមុខតំណែងជាមេលើពួកមហាតលិក។
60. លោកយេរេមាសរសេរអំពីទុក្ខលំបាកទាំងប៉ុន្មាន ដែលកើតមានដល់ស្រុកបាប៊ីឡូន ទុកក្នុងក្រាំងមួយ គឺព្រះបន្ទូលទាំងអស់ស្ដីអំពីស្រុកបាប៊ីឡូន ដូចមានចែងទុកខាងលើនេះស្រាប់។