12. Upeicharamo, opa mbae peê peipotáva oyapo peême umi caraí cuera, upeichaite peyapo peê avei ichupecuera. Cóicha voí oyee vaecue pe Moises cuatiápe ja umi ñemoñeêjaré cuatiápe.
13. Peike catu pe okê ipychiî rupi! Ipŷguasú voi pe okê ja ipŷguasú pe tapé ojova pe teco ocañyjápe, ja jeta umi oikéva upérupi.
14. Ipychiî pe okê, ja ipychiîete pe tapé ojova pe tecové jaetévape, ja mbobŷ oime umi oyujúva.
15. Peyererecó catu umi ñemoñeêjaré iyapúvagui oúva pene rendape iñemondéjá ovechaicha ja ipyaitépe jeco aguará guasuicha imondáva rejeguáva.
16. Jiacué reje pejechacuaa ichupecuera. ¿Sapya pico ñamonoô parralá caavó jatîva gui, terâpa higoá ñuatî gui?
17. Upeicha opa ybyrá racâ ipôrâva guíve jiá pôrâ, ja co ybyra racâ ivaíva jiá vaí.
18. Nda iyái ybyrá racâ ipôrâvape jiá vaí jaguâ. Upeicha avei co ybyra racâ ivaívape nda iyái jiá pôrâ jaguâ.
19. Umi ybyrá racâ jiá pôrâ ŷ va guive toñekytîmba, ja toyeitŷ tatape.
20. Upeichavo jiacué reje pejechacuaane ichupecuera.
21. Nda opa jeíva Chevei: Ñandeyara! Ñandeyara! oikéne pe tetâ yvapeguape: upévante upe oyapóva Che Ru yvape oiva rembiapoucapŷ.
22. Oimene jeta jei vaerâ Cheve upe jaárape: Ñandeyara! Ñandeyara! ¿no roñemoñeêipa raé co Nde rérape? ¿ja Nde rerape voípa ndo roityi raé mbaepochy? ja ¿Nde rérape pa ndo royapoi jeta mbae guasu?
23. Ja uperamo aicuaaucáne umivape cuera: Máramo Che nda poicuaai raé. Peyeóinte Che jegui, peê mbaevaí apojá cuera.