26. ja sapya yae ramo: Caraicuera guiguaré, yakyjŷyé co tetâmeguagui. Opavavé jaecuérava oguereco racaé Juanpe ñemoñeêjára ramo.
27. Upévareje oñeê Jesúspe ja jei: Ndo roicuaai. Ja Jae jei ichupecuera: Upeicha avei Che ndaei peême mbaéicharupípa iya Cheve ayapo jaguâ âmbae.
28. Opaichavévonte mbaépa jiâ peême? ¿Mbaetecópa? Oime vaecue guaú peteî carai itaŷra mocoîva ja jae ôguajê guaú pe iyŷpycuépe ja jei ichupe: Che raŷ, terejó angué voí, embaapomí cocuepe.
29. Ja jae jei: Ndajáséi. Upegui curimive guaú oñembyasŷ ja ojo.
30. Ja ôguajê guaú pe ambuepe ja jei ichupe upeicha yebynte, ja jae jei: Neí, caraí! ja ndojoi.
31. ¿Máva umi mocoî guipa oyapo itúva rembipotá? Ja jaecuera jei ichupe: Pe iyŷpycuénte. Ja Jesús jei ichupe cuera: Añete Che jae peême, umi tecové tieŷ ja umi cuña jeco vaíva oikéne pene renonde pe Tûpâ Ñandeyára retâ yvapeguape.
32. Ou racae peême pe Juan umi imarangatúva recope oicovachagua, ja peê ndaperoviai ichupe. Umi tecové tieŷ ja umi cuña jeco vaíva ogueroviá ichupe catuetei, ja peê pejechapá ramo yepe umimbae, na peñembyasŷi racaé yepe ipajápe peroviá jaguâicha ichupe.
33. Pejendúmíkena co mbae raânga ñeême ambue. Oime vaecue guaú peteî caraí ogayára oyapo vaecue jemitŷ jaguâ ja omongorá ybyrá râcâme ja oyoó ybycuá pe parralá oñamí jaguâ ja omopuâ ipype avei peteî mañajá yvaté, ja omoingue ipypé guaú imbaapojarâ cuerape, ja jae ae oyeí mombyryjápe.
34. Uperire guaú jiâguima ramo pe jiá jaguâ parralá, jae ombou jembiguaipe umi ombaapóva rendape oipyjy jaguâ pe jiacué gui pe iya vaerâ ichupe.
35. Ja umi ombaapóva guaú oipyjy jembiguaipe cuera ja ombuepotí peteîvape, ja oyuca ambuepe ja oyapi itápe ambuecue cuerape.
36. Uperire guaú ombou pyajú yeby jembiguai ambuecue jetavé umi iyŷpy vaecue gui, ja jaecuera oyapo upeicha yebŷnte jeseve cuera.
37. Ja ipajápe guaú ombou jendapecuera itayra teépe jeivo: Sapya oyepoŷjúnte che raŷ gui.
38. Ja umi ombaapova guaú ojechama ramo pe taŷrape jei oñondive: Coina ape ou pe mbaeyararâ! yajá yayucá ichupe, ja yayapyjŷ co imbae rângue.
39. Upei catu guaú oipyjŷ ichupe ja omosê ichupe pe cocue gui ocape ja oyucá ichupe.
40. Anga catu ou ramo pe cocue yára ¿mbaépa oyapone umi ombaapóvape cuera?
41. Ja jaecuera jei Ichupe: Ombuaípáiténe umi itieŷvape, ja omoinguéne icocuepe ombaapojarâ ambuecuepe omeê vaerâ jecópe jiacue jiayú jápe.