48. Upei catu Jesús jei ichupecuera: ¿Peyúpa peina peê imondajá vaicha reje Che yapyjŷ jaguâ Cheve pende kysé pucu ja ybyrá rejeve.
49. Opa árape aime vaecue aicovo pene ndive tûpâope ja nda chepyjŷi. Upeichante vaerâ voí oico jaguâ jecópe pe Santa Escriturape oyeé vaecue.
50. Upemaramo ojeyápa Ichupe jemimboe cuera yoa ja oñeguajêmba.
51. Oimente peteî cariaŷ jete opívo oñemo âcâjoyánte ojóva japycueri, ja oipyjŷ ichupe jaecuera,
52. ja jae ojeyá iñâcâjoyá ja oñeguajê ichugui cuera opívo.
53. Upei catu oguerajá Jesúspe pe pai guasu rendape ja oñembŷatŷ Jendápe opa umi pai ruvicha ja caraí ituyáva ja umi escriva iñarandú reíva.
54. Ja upe aya Pedro ou jina japycueri mombyry guive ôguajê meve pe pai guasu corapy peve. Ja opyta upepe oguapy jina umi tembiguai ndive ja oyepeé jina pe tata ypype.
55. Ja umi paí ruvicha ja opa umi iñarandúva yoa ojeca oicovo omboyá vaerâ Jesús reje icatu jaguâ oyucauca jaguâ Ichupe. Ja ndicatui oyuju mbaeve.
56. Ja oime ramo yepe jeta omboya rei vaecue Jesé yapujápe tuvicha oyuabŷ oyuejegui cuera iñeême.
57. Upei catu opuâ omboyá reíva Jese yapujápe ja jei:
58. Ore rojendu jei ramo Jae: Che ambuaipáne co tûpâo iyapopŷré cuimbaepó rupi ja mbojapy arajápe amopuâ yebyne ambue oyeyapo ŷ vaerâ cuimbae pó rupi.
59. Opaichavévonte nda upeichai yepe oyoyá oñondive pe jeívape.
60. Upei catu pe pai guasu opuâ oñemboŷ iyapytépe cuera ja oporandú Jesúspe jeivo: ¿Ne reñeêipa mbaeve Ndeyeje? ¿Mbaé mbaépa oicuaaucá umiva co omboyá vaecue Ndereje?
61. Ja Jae okîrîrî ja mbaeveté ndeiri. Upévareje pe pai guasu oporandu yeby Ichupe ja jei: ¿Nde pipo pe Cristo upe Imarangatúetéva Raŷ?
62. Ja Jesus jei: Che jae! ja peê pejechane co Caraí Raŷpe oguapŷ ramo pe Ipuacaitéva acatua cotŷ ja ou yeby ramo yvágagui araí apytepe.
63. Upei catu pe pai guasu omondoró iyao ja jei: ¿Maerâpa ñaicôtevêvé ambue reje oñeê vaerâ?
64. Peê voí pejendúma rae peêcuera iñeê oñeê vaíja Tûpâ Ñandeyára reje. ¿Mbaépa peimoâ peê? Ja opavave jaecuera omoî vaí Ichupe jeivo iyajá Ichupe oyeyucá jaguâ.