34. ja jei ichupecuera: Che pya mbyasy tuvichaite eterei amano jaguâicha yepe. Pejaârôke ape ja pemaña.
35. Upei catu Jae ojo tenondemi ja oyeity ybype ovapŷvo, ja oñemboe oyerurévo icatuta ramo ojasa rei jaguâ Ichugui pe ára pojyi,
36. ja jei: Abba, Che Ru, opambae iya Ndeve reyapo jaguâ. Eipeá Chejegui co mbayru. Opaichavo nda Che rembipotai. Ne rembipotante vaerâ.
37. Upei catu ou yeby ja oyuju ichupecuera oké jicuai ja jei Pedrope: Nde, Simon ¿rekepa reina? ¿Ndicatuipa raé remaña reké ŷ reje sapyamiminte yepe?
38. Pemañante ja ani peké ja peñemboe ani jaguâ peiké pe aña pende pyá raâ jaguâme. Pende pyaguasú ja pende kyreŷ ramo yepe, ipituánte pende reté.
39. Ja Jae ojo yeby ja oñemboé jeivo umi ñeê voínte jei vaecue.
40. Upei catu ou yeby ja oyuju ichupecuera oké jicuai jopejyieté voí jaecuera, ja upeagui ndoicuaai jei vaerâ Ichupe.
41. Ja ou ramo Jendápe cuera mbojapy yeby jápe jei ichupecuera: Pekénte ja pepytuú. Ipôrâma, jiáraguâjêma, ja co Caraí Raŷ oñemeêtama umi angaipavóra pope.
42. Pepuânte yajá! Jiâguima jina pe Che yapyjŷucájarâ.
43. Upeyave oñeê pypé Jae jina ou pe Judas umi doceve rejeguare petei ja oime jendive jeta tecove ouva kysé pucu rejeve ja ybyrá rejeve, umi pai ruvicha ja umi escriva iñarandu reíva ja caraí ituyáva remimbou cuera umia.
44. Ja upe iyapyjŷucájarâ oñomomarandú ma racae oñondive ja jeima racae ichupecuera: Upe che ayurupytéva upéva Jae. Peipyjŷnte Ichupe peñapytînte jâtâ ja perajá.
45. Upeicha ou voí ja oñemoânguívo Ichugui jei Ichupe: Rabbí! Che poromboejára! ja upeicha oyurupyté Ichupe.
46. Upevove oyapocoí Jese ja oyocó Ichupe.
47. Upei catu peteîva umi oñemboŷva jina upepe ôguenojê ikysé pucu ja oicutu pe pai ruvicha rembiguaipe ja oinambió.