13. Ja upegui ombou Jendápe peteîva umi fariseo cuérava ja umi herodiano cuérava oñapytî potávo Ichupe iñeéme.
14. Upearâ ou Jendápe ja jei Ichupe: Ore poro mboejára, ore roicuaa Ndejá carai umi oñeê jecoitepe rejeguáva, ja reyepoyjú ŷ vajá avave gui, ja Nde voí ne remaêvái ybypóra apé reje, ja añetejápe remboejá jecópe Tûpâ Ñandeyára rapé reje. Upeicharamo erente oreve ñameê vaerâpa Cesarpe pe mbaerepy mburuvicha oyeruréucáva terâpa ajaniri?
15. ¿Ñameê vaerâpa terâpa na ñameê vaerâi? Ja Jae ojechacuaa voí jovamocoijá, ja upeareje jei ichupecuera: ¿Maerâpa pe Che mbuajei Cheve? Perunte Cheve pirá pirémi tajecha.
16. Ja oguerú Ichupe peteî ja Jae jei ichupecuera: ¿Máva raângápa coa? ¿ja mbaépa co oyejaíva jesé?
17. Ja jaecuera jei: Cesar mbae. Ja Jesús jei ichupecuera: Cesar mbae, upeicharamo, pemeênte Cesarpe jecópe, ja pe Tûpâ Ñandeyára mbae pemeê Ñandeyárape. Ja ojecharâmôite Ichupe.
18. Uperire ou Jendápe saduceo cuera: umia catu umi jeiva ndoicoi jaguâ yaicove yeby jaguâ ára umi omano vaecue paûgui. Ja oporandu Ichupe jeivo:
19. Ore poro mboejára, pe Moises omoí vaecue cuatiápe co jembiapoucapŷ ñandéve. Sapya omano ramo peteî cuimbae ja ojeya ityreŷ jembireco ja nda itaŷrai ipypé, pe itybŷra tomendá jembirecocue reje jae imemby jaguâ ichugui, itykeŷra recoviárâ.
20. Oime guaú vaecue siete cuimbae oyuejegua ja pe iyŷpycue omendá cuña reje, ja omano nda itaŷrai.
21. Ja pe itybyra mocoîjá omenda jesé ja omano jae avei ojeya ŷ reje taŷra. Ja pe mbojapyjá upeicha avei,
22. ja umi sietevé nda itaŷrai ipypé. Ja ipajaitépe omano pe cuña avei.
23. Upeicharamo pe yaicove yeby jaguâ árape ¿máva ichuguicuera rembirecópane pe cuña? Umi sietevé voí omendama racaé jesé.
24. Upei catu Jesús jei ichupecuera: ¿Nda jaéipa coa reje peê peyabŷjá nda peicuaai járeje Santa Escritura ja nda peicuaai járeje Tûpâ Ñandeyára ipuacacué.