33. ja oyepeata ramo jina jaecuera Ichugui, Pedro jei Jesúspe: Ore Carai, ipôrâ nico ore roime coápe. To royapo mbojapy cuarajŷâ, peteî Ndeve guârâ ja ambue Moises peguârâ, ja ambue Elias peguârâ: ndoicuaai voí pe jeiva.
34. Ja oñeé pype jina âmbae, sapyaite peteî araí omoâmba ichupecuera ja okyjŷyé tuvicha jaecuera oikévo pe araí guŷpe.
35. Upei catu ou peteî ñeê pe araí apytegui jeiva: Cova Che Ray Che poravópyré. Pejendu catu Ichupé.
36. Ja ojasavo pe ñeê oime oyeju jaeño Jesús, ja jaecuera okîrîrî, ja umi ára rupi ndeiri avavépe mbaeve pe ojecha vaecue gui.
37. Upe ára ambuepe ogueyŷma ramo pe itáatŷra ári gui oime jeta ybypora ojuââi osê ojuvâitivo Ichupe.
38. Ja oime peteî cuimbae umi iyatŷ vaecue cuérava osapucaiva oyerurévo: Ore poromboejára, ayeruré Ndeve rejecha mi jaguâ che raŷpe, che raŷ jaeñomi voínte.
39. Ja oime peteî mbaepochy oipyjŷva ichupe, ja upegui jae sapyaite osapucai ja upei catu omochâimbá ichupe ja omboyurujŷyúipá ja jasype oyei ichugui, oñopûmbá rirente ichupe.
40. Ja che ayerure curi Ne remimboecuerape oity jaguâ ichupe, ja jaecuera ndicatui.
41. Ja jei Jesús: Peê umi oyeroviaŷva rejegua ja pene âcâjâtâva. ¿Aracaépevépa aime vaerâ pene ndive ja aracaé pevépa arokîrîrî vaerâ? Erúnte Cheve nde raŷ coápe.
42. Ja jiâgui vove, pe mbaepochy oity ichupe ybype ja omochâimba jeté. Upei catu Jesús oyaó pe mbaepochŷpe ja omojesâi pe mitâ cuimbaepe ja omeê ichupe itúvape.
43. Ja opavavé ojecharâmô jicuai co Tûpâ Ñandeyára rembiapo tuvicha gui.Ja upe yave opava ojecharâmô yave opa âmbae oyapova gui jina, Jae jei jemimboe cuerape:
44. Pemoingue co Che ñeê pende apysápe pene mandua jaguâ: Co Caraí Raŷ voí oñemeêta jina umi cuimbae pópe.
45. Uperamonte jaecuera ndo jechacuaai pe jeivaecue; oñemoâ voi ichugui cuera, anichene jaguâ ojechacuaa, ja okyjŷye oporandu jaguâ upe jei vaecue reje.
46. Uperire oyuabŷ jaecuera oyuejegui yajecha máva ichuguicuerapa pe tuvichaitevéva?
47. Ja Jesús ojechacuaa pe oyuabyjague ipyápe cuera ja Jae oipyjy ja ojupi peteî mitâmíme ja omoî ichupe iyŷké reje,
48. ja jei ichupecuera: Oime ramo oguerojorŷva co mitâme Che rerape Cheve Che rerojory avei, ja oime ramo Che rerojorŷva Cheve, upeva oguerojory avei pe Che mboujarépe. Upe mîchîetevéva pende apytepeguava, upea nico pe tuvichaitevé vaerâ.