1. Uperire pe sabado mocoîjá pe yasy ñypyrúmbŷ pypé Jesús oguata oicovo umi cocue rupi ja umi jemimboecuera oipoó oicovo pe jiacue, ja oipokytî ipope cuera jou jaguâ.
2. Ja oime umi fariseo cuérava jeiva: ¿Marâpa peyapo pe ipôrâŷva yayapo co sabado arete árape?
3. Ja jei ichupecuera Jesús: ¿Na pemoñeêipa racae pe cuatia ñeê Santa Escriturape guare pe oyapo vaecue gui David iñembyajŷi ramo guare ja umi jicuai vaecue jendive,
4. oike jague tûpâope ja oipyjy ja jou pe mbuyape caraí ja jouucá avei umi oi vaecuepe jendive, nda iyái voí avavépe jou umiva, umi paípe mante?
5. Ja Jae jei ichupecuera: Co caraí Raŷ sabado arete ára Yára yepe avei.
6. Uperire oime sabado ára ambuepe avei Jae oiké pe tûpâope ja oporomboe ja oi upepe peteî cuimbae ipo iyacatuapegua iyŷpíva.
7. Ja oime umi escriva iñarandú reíva ja umi fariseo jaecueranteséva omaña jese jicuai yajecha omojesâipa pe sabado areté árape, oyuju potávo omoî vaí jaguâ Ichupe.
8. Jae voí oicuaa pe jiâva ichupecuera ja jei pe cuimbae ipo iyŷpívape: Epuâ ja eñemboŷ mbytepe cuera. Ja opuâ voi jae ja oñemboŷ.
9. Upei catu Jesús jei ichupecuera: Taporandúmi peême ¿iyápa ñandeve co sabado areté árape yayapo pôrâ terâpa yayapo vaí, ñamojesâi jecove terâpa ñambuai jecove?