4. ja ojecharâmô jicuai upévagui, ja sapyaite oi oñemboŷ iyŷpype cuera mocoî cuimbae oñemondéva ao verápápe.
5. Ja okyjŷyé eterei gui jaecuera oyayby jicuai ja upei catu jaecuera jei ichupecuera: ¿Maerâpa pejecá umi omano vaecue apytepe pe oicovévape jina?
6. Ndiporiveima coápe. Oicove yebyma. Pene manduante Jae omongueta jague peême oime aya gueteri Galileape
7. jei ramo guare: Tecôtevê co Caraí Raŷ oñemeê jaguâ umi cuimbae angaipavóra pope, ja oyeyuca jaguâ curusu reje, ja oicove yeby jaguâ mbojapy arajápe.
8. Upei catu jaecuera imanduá iñeêngue reje,
9. ja oyeby pe itacuágui ja omomarandúpá umi mbae reje umi oncepe ja opa umi ambuecue cuérape.
10. Oime voí pe Maria Magdalena raé ja Juana ja Maria, Santiago sŷ, ja umi jendive cuera oí vaecue, umiva catu omombeu vaecue umi mbae umi jemimboe cuerape.
11. Ja jaecuera oimoâ itabŷva ñeêicha pe jaecuera jeíva ja ndo gueroviai ichupecuera.
12. Pedronte voí opuâ ja oñaní ojo pe itacuá jápe ja oyayby omaêvo ojecha iyaocue mante ja oyei yeby ogape ojecharâmô ojovo pe oyeju jague gui.
13. Ja sapya upe jaárape avei mocoî jesecueragua oyeói peteî tetâ mîchîva cotŷvo jérava Emmaus, oiva voí Jerusalem gui mocoî legua.
14. Ja oñomonguetá oyeóivo opa umimbae oyejú vaecue reje,
15. ja sapyaite oñomongueta yave jina oñondive ja oñoporandu oyoupe ojovo, Jesús ae oñemboya jesecuera ja ojo oñondive;
16. oyeyocónte jesa cuera anichene jaguâ ojechacuaa Ichupe.
17. Ja Jae jei ichupecuera: ¿Mbaépa co peñomonguetajá oñondive pejóvo? Ja jaecuera opyta jovasŷ jicuai.
18. Ja oñeê peteî ichugui cuérava, jérava Cleopas, ja jei Ichupe: ¿Sapyamíntepa reime neñojápe Jerusalempe, ja upeicharamo, nde reicuaai raé pe oyeju vaecue ipype cueje ambue árape?
19. Ja Jae jei ichupecuera: ¿Mbaepa? Ja jaecuera jei Ichupe: Pe Jesús Nazareno gui guare, caraí oñemoñeêjára vaecue, ipuacáva jembiapope ja iñeême Tûpâ Ñandeyára ypype ja opa co tetaŷgua ypype avei,
20. umi pai ruvicha ja umi mburuvicha omeê jague Ichupe oyeyuca jaguâ ja omoî jaguâ Ichupe curusu reje.
21. Ore voí rojaarô vaecue Jae jague co Israel repŷjá rangue. Coanga voí opa âmbae rejeve yepe oyapo mbojapy ára oico jague umi mbae.
22. Oime yepe cuña caraí cuera ore cuérava ore mondyi vaecue coê mboyve yeco oyeói raé pe itacuá jápe,
23. ja ndoyujui pype jetecue ou yeby, ja jei ojecha jague yvapegua cuerape oyejechauca vaecue ja jei vaecue ichupecuera Jae oicove yebŷjá.