26. Upemaramo oyeí ja oipyjy sietevé mbaepochy ondive iñañavéva ichuguí voí, ja umiva oike ja opyta upepe ja pe cuimbae reco ipajapegua ivaívé pe iyŷpycue ramo guarégui.
27. Ja Jae jei vove umi mbae oime peteî cuña umi jicuaivagui osapucai ja jei: Jeco marangatu vaerâ, ipoaite pe cuña jygúe Nde ryrú vaecue, ja icáma Ne mocambu vaecue!
28. Ja Jae jei: Jiâ co Cheve ipoaitevé vaerâ umi ojendúva Tûpâ Ñandeyára Ñeê ja ombuayéva ichupe jecope.
29. Upei catu oñembyaty ramo jina umi ybypóra Jae oñypyru jei ichupecuera: Coâva rejegua cuera coangagua ivaíva rejegua voí. Ojechase jaecuera mbae jechapyrâ reí, ja ndo yejechaucáne ichupecuera mbaeve jechapyrâ, pe Jonás jechacuaápyré mante.
30. Upe Jonás oñemoingo jagueicha mbae jechacuaapyrâicha umi Nineveŷguape, upeicha avei co Caraí Raŷ oñemoingóne jechacuaapyrâicha coâva cuera rejegua coangaguávape.
31. Upe cuña caraí mburuvicha guasu ybŷcotyó gua opuâ vaerâ upe oñembojecoviá jaguâ árape umi cuimbae cuera coâva rejegua coangagua ndive, ja omoî vaíne ichupecuera. Upéva voí ou mombyryete gui co yby yva guive voí ojendu jaguâ pe Salomon mbaecuaacue gui, ja coina ape oime peteî tuvichavéva Salomóngui.
32. Umi Nineveŷgua cuera opuâ vaerâ umi cuimbaecuera coangagua ndive upe oñembojecoviá jaguâ árape ja omoî vaí vaerâ ichupecuera. Umiva nico oñemboyere oñembo jecopôrâvo pe Jonas oñemoñeê jague rupi. Ja coina ape oime peteî tuvichavéva pe Jonas gui.
33. Ndipori omyandŷva tataendŷ omoî jaguâ coty ñemijapeguápe, terâ mbayru guype, pe tataendy rendape mante omoî umi oikéva jina ojecha jaguâ jendyjá.
34. Co ñande rete ojesapéva ñande resá voí. Nde resápysó pôrâ ramo jecópe, nde rete avei oyejesapépá vaerâ. Nde resápyso vaí ramo opa nde rete avei iñypytûmba vaerâ.
35. Upeicharamo remaê porâ vaerâ yajecha pe ojesapéva oiva pende pype ndajaeijá iñypytûvánte.
36. Upeicharamo nde rete oyejesapépá ramo, ja ndipori ramo mamové iñypytûjá, oyejesapépá vaerâ pe tataendy jendy pôrâvaicha ndeve nderesapé jaicha ramo.