26. Ja Jae jei ichupe: ¿Mbaépa oyeé pe Moises cuatia ñeême? ¿Mbaeichaguápa pe remoñeêva pype?
27. Ja jei jae: Rejayju vaerâ ye Tûpâ Ñandeyárape ndepyapy guive, ja opa ne anga rejeve ja opa nde puacacue rejeve ja opa nembaecuaa rejeve, ja rejayjú vaerâ nde rapichápe ndeyupe guaicha.
28. Ja jei Jesús: Upeicha! nde ere jecope. Eyapo upeicha nde, ja reicové vaerâ.
29. Upegui jae jaeséntevágui voí jei Jesúspe: ¿Mávapa che rapicha?
30. Ja jei yeby Jesús: Oime peteî cuimbae guaú ojo vaecue jina Jerusalem gui Jericope ojóvo ja joa moñai cuera pope, ja umiva omoñemboí ichupe ja oicutupá ichupe ja oyeoi voívo ojeya ichupe omano vaí vaí.
31. Ja sapyante guaú ojasa oicovo pe tapé reje voínte peteî paí, ja jae ojecha vove ichupe ojasa jovai rupi ojóvo.
32. Ja upeicha avei guaú ou peteî Levita ja ôguajê pe oijape, ja ojecha vove ichupe ojasa jovai rupi ojovo.
33. Upei catu guaú ou peteî Samariaŷgua ojasavo ojovo, ja jae oñemboya Jendápe ja ojecha ramo ichupe oiporiajuvereco ichupe,
34. ja ôguajê Jendápe ja oipôjânô pe iyecutu jague ñandŷ ja vinope ja oyocua pôrâ jecope, ja upei catu ojupi ichupe oguenda ári ja ogueraja ichupe peteî ñembojupájápe ja oñangarecóucá jese.
35. Ja pe ára ambuepe guaú ojota pype jina ôguenojê mocoî mbaerepy ja omeê pe ogayárape, ja jei ichupe: Eñangareco pôrâ cheve jese, ja oime ramo remoîve vaerâ ichupeguârâ ayu rire che ambojecoviáne ndeve.
36. ¿Mavapa, upeicharamo, umi mbojapy gui jiâ ndeve oñembo japicha raé pe joa vaecue umi moñai cuera pope pe?
37. Ja jae jei: Upe oiporiajuvereco vaecue ichupe, upéva jae. Upei catu Jesús jei ichupe: Terejó, nde eyapo peteîcha.
38. Uperire sapya Jae ojovo ôguajê peteî ogajápe ja peteî cuña caraí jérava Marta oguerojorŷ Ichupe jogape.