43. Upei catu jeipáma ramo upea, osapucai jâtâ: Lazaro, esê catu!
44. Upei catu upe omano vaecue osê ipo ja ipy oyeyocua ao pype, ja jova oyeyajoi peteî aope. Ja Jesús jei ichupecuera: Peyoránte ichupe, ja pepoí ichugui!
45. Upei catu jeta umi Judio, ou vaecue Maria rendape, ja ojecha vaecue pe Jae oyapo vaecue, oyeroviá Jese.
46. Oime ambuecue cuera ichuguicuérava ojo voi umi fariseo rendape ja omombeúpá ichupecuera pe Jesús oyapo vaecue.
47. Upévareje umi pai ruvicha ja umi fariseo oñembyaty pe oñomonguetajápe ja jei: ¿Mbae pico yayapo ñaina ñande? Co carai voí jetaite mbaeguasu oyapo.
48. Ja yajeya reí ramo Ichupe upeicha, opava oyeroviane Jese, ja oune umi Romano ja omboíne ñandejegui ñane renda ja ñane retâ.
49. Upei catu Caiafas, peteî jaecuerava, upéva pai guasu uperamoguare, jei ichupecuera: Peê ndapeicuaai mbaeve,
50. ja ndapejechacuaai ipôrâjá omano jaguâ peteî cuimbae co ñane retâmegua rejejápe, oñembyaipá ŷ jaguâ opa ñande cuera ñaneretâmegua.
51. Co âmbae jae ndeiri oyejegui vointe, oico guinte pai guasu ramo uperamo guare omojerâcuâ tenonde guive vointe omano vaerâjâ Jesús pe tetâmegua rejejápe,
52. ja nda pe tetâmegua rejejapente añoi, icatu jaguâ rejejápe ombyatypá avei peteî atyrape umi Tûpâ Ñandeyára raŷ cuera, umi oñemuasâi vaecue oparupi.
53. Upeicharamo upe jaára guive oñomongueta oñondive oyuca jaguâ Ichupe.
54. Upévareje Jesús ndoicóvémái opava resápe umi Judio cuera apytepe, oyeínte upegui ja ojo pe tetâ, oiva pe ñû oyeicoŷjápe ypype, peteí tetâ jérava Efraim meve ja opyta upepe jemimboe cuera ndive.
55. Ja uperamo jiâguima jina pe Judio arete guasu pascua ja jeta ojo pe tetâ gui Jerusalempe pe pascua arete ára mboyve oñembuesacoi jaguâ jecópe.
56. Upévareje omaña Jesús reje jicuai, ja oi pype oñemboe jicuai pe tûpâope oñomongueta oñondive jeivo: ¿Mbaépa peimoâ peê? ¿Oicotapa Jae co arete guasu jápe terâpa ajaniri?
57. Umi pai ruvicha ja umi fariseo oicuaáucáma racae voí oime ramo oicuaava mamópa oi Jae omomarandu jaguâ ichupecuera oipyjyucá jaguâ Ichupe.