10. Amomaitéiucá Apelespe, oyecuaa pôrâva Cristo rejeguajá. Amomaitéiucá avei umi Aristobulo rogaŷguape.
11. Amomaitéiucá Herodion pe cherejeguape. Amomaitéiucá avei umi Narcisso rogaŷguape Ñandeyára rejeguáva voi.
12. Amomaitéiucá Trifenape ja Trifosape, umi ombaapova Ñandeyára rejegua ramo. Amomaitéiucá Persida pe cherayjupárape, upéva jeta ombaapova Ñandeyára rejegua ramo.
13. Amomaitéiucá pe Rufope Ñandeyára rembiporavó, ja isŷpe, upeva che sŷvaicha avei.
14. Amomaitéiucá Asincritope ja Flegonpe, ja Hermespe ja Patrobaspe ja Hermaspe, ja umi ñande reŷicuera jicuaiva jendivecuera.
15. Amomaitéiucá Filologope ja Juliape ja Nereope ja teindŷrape ja Olimpaspe ja opa umi imarangatuva jicuaiva jendive cuera.
16. Peñomo maitéi peyoyurupyte imarangatúvaicha. Opa umi Iglesia Cristo rejeguava pene momaitéiucá peême.
17. Anga ayerure peême che reŷicuera, pemaña jaguâ umi oyuabyva ja itieŷva reje, oicoŷva pe teco ipôrâvape ore pomboe jague peême, peyepeante catuete ichuguicuera.
18. Umichagua voi ndajaei Ñandeyára Cristo rembiguai, oyeyocuaiucante jyguéteé rejeguârâ, oñeê jeêmbochŷ ja ojovasa guaujápe ombotabyvo umi itabŷvape ipyapecuera.
19. Oicuaapáma opavave pembuayéjá peê jecópe, upévareje che rory penendive, upeicharamo yepe, aipota pene arandu mbae pôrârâme ja pende tabyvaicha mbae ivai râme.
20. Ja co Tûpâ Ñandeyára ñane mbopyaguapŷva vocoi omopêucá pe mbaepochy Satanaspe pende py guype.Ñandeyára Jesu Cristo ta ipya pôrâ peême.
21. Oime pene momaitéiucá peême pe Timoteo che pytyvôjare ja Lucio ja Jason ja Sosipater che rejegua cuérava.
22. Che, Tercio, co cuatia ñeê apojaré voi pomomaitéiucá peême Ñandeyára rerape.
23. Oime pene momaitéiucá peême Cayo pe che mbojupá. Upeva voi opa umi Iglesia Cristo rejeguava mbojupá avei. Pe Erasto penemomaitéiucâ peême pe mbaerepy rerecuá co tetâmegua, ja pe ñande rejegua Cuarto.