18. ja oipyjŷucá umi Apostol cuerape ja omoinguéucá ybyracua rogape.
19. Upei catu ou pe Ñandeyára remimbou pyjaré ja oipea pe ybyracua roga rokê ja oguenojê ichupecuera ocápe ja jei:
20. Tapejónte ja peiméma ramo tûpâope peñemoñeê umi tetaŷguape opa co Ñeê Tecové Marangatu gua gui.
21. Ja ojenduma ramo umimbae pyjareve yepe oiké jaecuera tûpâope ja oporomboe. Ja upe aya ou pe paiguasu ja umi jicuai vaecue jendive ja ojenoî umi ambuecuepe oñomongueta jaguâme, ja umi ituyáva Israel cuéravape, ja omondo ybyracua rógape oguerúrucávo ichupecuera.
22. Ja oguajêma ramo umi tembiyocuai ndoyujui ichupecuera ybyracuá rogape, upévareje oyeby ja omombeu jeivo:
23. Añetejápe royuju pe ybyracuá roga oñemboty jâtâ pôrâ ja umi okê ñangarecójá oi umi okê renondepe, upegui roipea ramo ndo royujui avavepe jyguepŷpe.
24. Upei catu ojenduma ramo umi ñeê pe paiguasu ja pe tûpâo ñangarecojá ja umi pai ruvicha ipya tarová mamópevépa oyupity âmbae.
25. Uperamo voí ou peteî omombeúva ichupecuera jeivo: Peina jina umi cuimbae remoinguéucá vaecue ybyracuá rogape oi tûpâope jicuai ja oporomboe jina umi ambuecue cuerape.
26. Upemaramo ojo pe tûpâo ñangarecójá umi tembiyocuai rejeve ja ogueru ichupecuera oinûpâ ŷ reje: jaecuera voi okyjŷye umi japicha cuera oyapi jaguâ itápe ichupecuera.
27. Upegui oguerúma ramo ichupecuera omoingué ichupecuera pe coty oñomongueta jaguâme. Ja pe paiguasu oporandu ichupecuera,
28. jeivo: ¿Ndo roeipa rae peême ndo roipotaijá peê peporomboe Upéva rérape? ja peina jina oime pemuenyjê nerae co Jerusalem pene poromboegui, ja pemboyásé rei yeco co Cuimbae ruguycue orereje.
29. Upei catu Pedro ja umi Apostol cuera oñeê ja jei: Tecôtevê ore ñeêrendú Tûpâ Ñandeyárape ja na umi carai cuerapei.
30. Upe ñanderu ypycue Tûpâ Ñandeyára omopuâ Jesúspe pe peyuca vaecue peê pemosaingo pype ybyra yoasá reje.
31. Covape Tûpâ Ñandeyára omboyupi rae iyacatuape Ñande Rapecuaajarâ ja Ñane mopôtíjarâ ramo omeê jagua Israel cuéravape oñembo jecopyaju jaguâ ja oyepea jaguâ iñangaipa gui.
32. Ore voi jechajaré ramo roicuaauca añetéjá co roéva ja upeicha avei omoañeté pe Espiritu Santo upe omeêva Tûpâ Ñandeyára umi iñeêrendúvape Ichupe.
33. Upei catu ojendu pype umi mbae ipochy eterei ja oñomongueta oñondive oyucaucá jaguâ ichupecuera.
34. Uperamo oñemboŷ pe cotype peteî fariseo, jérava Gamaliel, carai iñaranduva ja icaavóva opa pe tetâmegua ndive, ja jae ôguenojêuca ocape sapyami umi cuimbaepe.