3. Gwell yw dicter na chwerthin: canys trwy dristwch yr wynepryd y gwellheir y galon.
4. Calon doethion fydd yn nhŷ y galar; ond calon ffyliaid yn nhŷ llawenydd.
5. Gwell yw gwrando sen y doeth, na gwrando cân ffyliaid.
6. Canys chwerthiniad dyn ynfyd sydd fel clindarddach drain dan grochan. Dyma wagedd hefyd.
7. Yn ddiau trawsedd a ynfyda y doeth, a rhodd a ddifetha y galon.
8. Gwell yw diweddiad peth na'i ddechreuad: gwell yw y dioddefgar o ysbryd na'r balch o ysbryd.
9. Na fydd gyflym yn dy ysbryd i ddigio: oblegid dig sydd yn gorffwys ym mynwes ffyliaid.
10. Na ddywed, Paham y bu y dyddiau o'r blaen yn well na'r dyddiau hyn? canys nid o ddoethineb yr wyt yn ymofyn am y peth hyn.
11. Da yw doethineb gydag etifeddiaeth: ac o hynny y mae elw i'r rhai sydd yn gweled yr haul.
12. Canys cysgod yw doethineb, a chysgod yw arian: ond rhagoriaeth gwybodaeth yw bod doethineb yn rhoddi bywyd i'w pherchennog.
13. Edrych ar orchwyl Duw: canys pwy a all unioni y peth a gamodd efe?
14. Yn amser gwynfyd bydd lawen; ond yn amser adfyd ystyria: Duw hefyd a wnaeth y naill ar gyfer y llall, er mwyn na châi dyn ddim ar ei ôl ef.
15. Hyn oll a welais yn nyddiau fy ngwagedd: y mae un cyfiawn yn diflannu yn ei gyfiawnder, ac y mae un annuwiol yn estyn ei ddyddiau yn ei ddrygioni.
16. Na fydd ry gyfiawn; ac na chymer arnat fod yn rhy ddoeth: paham y'th ddifethit dy hun?
17. Na fydd ry annuwiol; ac na fydd ffôl: paham y byddit farw cyn dy amser?
18. Da i ti ymafael yn hyn; ac oddi wrth hyn na ollwng dy law: canys y neb a ofno Dduw, a ddaw allan ohonynt oll.
19. Doethineb a nertha y doeth, yn fwy na deg o gedyrn a fyddant yn y ddinas.
20. Canys nid oes dyn cyfiawn ar y ddaear a wna ddaioni, ac ni phecha.