10. Ac offrwm hanner hin o win yn ddiod‐offrwm, yn aberth tanllyd, o arogl peraidd i'r Arglwydd.
11. Felly y gwneir am bob ych, neu am bob hwrdd, neu am oen, neu am fyn.
12. Yn ôl y rhifedi a ddarparoch, felly y gwnewch i bob un, yn ôl eu rhifedi.
13. Pob priodor a wna'r pethau hyn felly, wrth offrymu aberth tanllyd o arogl peraidd i'r Arglwydd.
14. A phan ymdeithio dieithrddyn, neu yr hwn sydd yn eich plith trwy eich cenedlaethau, a darparu aberth tanllyd o arogl peraidd i'r Arglwydd; fel y gwneloch chwi, felly gwnaed yntau.
15. Yr un ddeddf fydd i chwi o'r dyrfa, ac i'r ymdeithydd dieithr; deddf dragwyddol yw trwy eich cenedlaethau: megis yr ydych chwi, felly y bydd y dieithr gerbron yr Arglwydd.
16. Un gyfraith, ac un ddefod, fydd i chwi, ac i'r ymdeithydd a ymdeithio gyda chwi.
17. A llefarodd yr Arglwydd wrth Moses, gan ddywedyd,
18. Llefara wrth feibion Israel, a dywed wrthynt, Pan ddeloch i'r tir yr ydwyf yn eich dwyn chwi iddo;
19. Yna pan fwytaoch o fara'r tir, y dyrchefwch offrwm dyrchafael i'r Arglwydd.
20. O flaenion eich toes yr offrymwch deisen yn offrwm dyrchafael: fel offrwm dyrchafael y llawr dyrnu, felly y dyrchefwch hithau.
21. O ddechrau eich toes y rhoddwch i'r Arglwydd offrwm dyrchafael trwy eich cenedlaethau.
22. A phan eloch dros y ffordd, ac na wneloch yr holl orchmynion hyn, y rhai a lefarodd yr Arglwydd wrth Moses,
23. Sef yr hyn oll a orchmynnodd yr Arglwydd i chwi trwy law Moses, o'r dydd y gorchmynnodd yr Arglwydd, ac o hynny allan, trwy eich cenedlaethau;
24. Yna bydded, os allan o olwg y gynulleidfa y gwnaed dim trwy anwybod, i'r holl gynulleidfa ddarparu un bustach ieuanc yn offrwm poeth, i fod yn arogl peraidd i'r Arglwydd, â'i fwyd‐offrwm, a'i ddiod‐offrwm, wrth y ddefod, ac un bwch geifr yn bech‐aberth.
25. A gwnaed yr offeiriad gymod dros holl gynulleidfa meibion Israel, a maddeuir iddynt; canys anwybodaeth yw: a dygant eu hoffrwm, aberth tanllyd i'r Arglwydd, a'u pech‐aberth, gerbron yr Arglwydd, am eu hanwybodaeth.
26. A maddeuir i holl gynulleidfa meibion Israel, ac i'r dieithr a ymdeithio yn eu mysg; canys digwyddodd i'r holl bobl trwy anwybod.
27. Ond os un dyn a becha trwy amryfusedd; yna offrymed afr flwydd yn offrwm dros bechod.