1. Oherwydd paham, Job, clyw, atolwg, fy ymadroddion; a gwrando fy holl eiriau.
2. Wele, yr ydwyf yn awr yn agoryd fy ngenau; mae fy nhafod yn dywedyd yn nhaflod fy ngenau.
3. O uniondeb fy nghalon y bydd fy ngeiriau; a'm gwefusau a adroddant wybodaeth bur.
4. Ysbryd Duw a'm gwnaeth i; ac anadl yr Hollalluog a'm bywiocaodd i.
5. Os gelli, ateb fi: ymbaratoa, a saf o'm blaen i.
6. Wele fi, yn ôl dy ddymuniad di, yn lle Duw: allan o'r clai y torrwyd finnau.
7. Wele, ni'th ddychryna fy arswyd i, ac ni bydd fy llaw yn drom arnat.
8. Dywedaist yn ddiau lle y clywais i, a myfi a glywais lais dy ymadroddion:
9. Pur ydwyf fi heb gamwedd: glân ydwyf, ac heb anwiredd ynof.
10. Wele, efe a gafodd achosion yn fy erbyn: y mae efe yn fy nghyfrif yn elyn iddo.
11. Y mae yn gosod fy nhraed yn y cyffion; y mae yn gwylied fy holl lwybrau.
12. Wele, yn hyn nid ydwyt gyfiawn. Mi a'th atebaf, mai mwy ydyw Duw na dyn.
13. Paham yr ymrysoni yn ei erbyn ef? oherwydd nid ydyw efe yn rhoi cyfrif am ddim o'i weithredoedd.