1. A Job a atebodd ac a ddywedodd,
2. Diau mai chwychwi sydd bobl; a chyda chwi y bydd marw doethineb.
3. Eithr y mae gennyf fi ddeall fel chwithau, nid ydwyf fi waeth na chwithau; a phwy ni ŵyr y fath bethau â hyn?
4. Yr ydwyf fel un a watwerid gan ei gymydog, yr hwn a eilw ar Dduw, ac efe a'i hetyb: gwatwargerdd yw y cyfiawn perffaith.
5. Lamp ddiystyr ym meddwl y llwyddiannus, yw yr hwn sydd barod i lithro â'i draed.
6. Llwyddiannus yw lluestai ysbeilwyr, ac y mae diogelwch i'r rhai sydd yn cyffroi Duw, y rhai y cyfoethoga Duw eu dwylo.
7. Ond gofyn yn awr i'r anifeiliaid, a hwy a'th ddysgant; ac i ehediaid yr awyr, a hwy a fynegant i ti.
8. Neu dywed wrth y ddaear, a hi a'th ddysg; a physgod y môr a hysbysant i ti.
9. Pwy ni ŵyr yn y rhai hyn oll, mai llaw yr Arglwydd a wnaeth hyn?
10. Yr hwn y mae einioes pob peth byw yn ei law, ac anadl pob math ar ddyn.
11. Onid y glust a farna ymadroddion? a'r genau a archwaetha ei fwyd?
12. Doethineb sydd mewn henuriaid; a deall mewn hir ddyddiau.