14. Pa fodd y dywedwch chwi, Cedyrn ydym ni, a gwŷr nerthol i ryfel?
15. Moab a anrheithiwyd, ac a aeth i fyny o'i dinasoedd, a'i dewis wŷr ieuainc a ddisgynasant i'r lladdfa, medd y Brenin, a'i enw Arglwydd y lluoedd.
16. Agos yw dinistr Moab i ddyfod, a'i dialedd hi sydd yn brysio yn ffest.
17. Alaethwch drosti hi, y rhai ydych o'i hamgylch; a phawb a'r a edwyn ei henw hi, dywedwch, Pa fodd y torrwyd y ffon gref, a'r wialen hardd!
18. O breswylferch Dibon, disgyn o'th ogoniant, ac eistedd mewn syched; canys anrheithiwr Moab a ddaw i'th erbyn, ac a ddinistria dy amddiffynfeydd.
19. Preswylferch Aroer, saf ar y ffordd, a gwylia; gofyn i'r hwn a fyddo yn ffoi, ac i'r hwn a ddihango, a dywed, Beth a ddarfu?
20. Gwaradwyddwyd Moab, canys hi a ddinistriwyd: udwch, a gwaeddwch; mynegwch yn Arnon anrheithio Moab;
21. A barn a ddaw ar y tir gwastad, ar Holon, ac ar Jahasa, ac ar Meffaath,
22. Ac ar Dibon, ac ar Nebo, ac ar Beth‐diblathaim,
23. Ac ar Ciriathaim, ac ar Beth‐gamul, ac ar Beth‐meon.
24. Ac ar Cerioth, ac ar Bosra, ac ar holl ddinasoedd gwlad Moab, ymhell ac yn agos.
25. Corn Moab a ysgythrwyd, a'i braich hi a dorrwyd, medd yr Arglwydd.
26. Meddwwch hi, oblegid hi a ymfawrygodd yn erbyn yr Arglwydd: ie, Moab a ymdrybaedda yn ei chwydfa; am hynny y bydd hi hefyd yn watwargerdd.
27. Ac oni bu Israel yn watwargerdd i ti? a gafwyd ef ymysg lladron? canys er pan soniaist amdano, yr ymgynhyrfaist.
28. Trigolion Moab, gadewch y dinasoedd, ac arhoswch yn y graig, a byddwch megis colomen yr hon a nytha yn yr ystlysau ar fin y twll.
29. Nyni a glywsom falchder Moab, (y mae hi yn falch iawn,) ei huchder, ei rhyfyg, a'i hymchwydd, ac uchder ei chalon.
30. Myfi a adwaen ei llid hi, medd yr Arglwydd; ond nid felly y bydd; ei chelwyddau hi ni wnânt felly.
31. Am hynny yr udaf fi dros Moab, ac y gwaeddaf dros holl Moab: fy nghalon a riddfana dros wŷr Cir‐heres.