10. Gwŷr gwaedlyd a gasânt yr uniawn: ond yr uniawn a gais ei enaid ef.
11. Y ffôl a dywallt ei holl feddwl: ond gŵr doeth a'i hatal hyd yn ôl.
12. Os llywydd a wrendy ar gelwydd, ei holl weision fyddant annuwiol.
13. Y tlawd a'r twyllodrus a gydgyfarfyddant; a'r Arglwydd a lewyrcha eu llygaid hwy ill dau.
14. Y brenin a farno y tlodion yn ffyddlon, ei orsedd a sicrheir byth.
15. Y wialen a cherydd a rydd ddoethineb: ond mab a gaffo ei rwysg ei hun, a gywilyddia ei fam.
16. Pan amlhao y rhai annuwiol, yr amlha camwedd: ond y rhai cyfiawn a welant eu cwymp hwy.
17. Cerydda dy fab, ac efe a bair i ti lonyddwch; ac a bair hyfrydwch i'th enaid.
18. Lle ni byddo gweledigaeth, methu a wna y bobl: ond y neb a gadwo y gyfraith, gwyn ei fyd ef.
19. Ni chymer gwas addysg ar eiriau: canys er ei fod yn deall, eto nid etyb.
20. A weli di ddyn prysur yn ei eiriau? gwell yw y gobaith am y ffôl nag amdano ef.