2. Pob ffordd gŵr sydd uniawn yn ei olwg ei hun: ond yr Arglwydd a bwysa y calonnau.
3. Gwneuthur cyfiawnder a barn sydd well gan yr Arglwydd nag aberth.
4. Uchder golwg, a balchder calon, ac âr yr annuwiol, sydd bechod.
5. Bwriadau y diesgeulus sydd at helaethrwydd yn unig: ond yr eiddo pob prysur at eisiau yn unig.
6. Trysorau a gasgler â thafod celwyddog, a chwelir megis gwagedd gan y neb sydd yn ceisio angau.
7. Anrhaith yr annuwiol a'u difetha hwynt, am iddynt wrthod gwneuthur barn.
8. Trofaus a dieithr yw ffordd dyn: ond y pur sydd uniawn ei waith.
9. Gwell yw bod mewn congl yn nen tŷ, na bod gyda gwraig anynad mewn tŷ eang.
10. Enaid yr annuwiol a ddeisyf ddrwg: nid grasol yw ei gymydog yn ei olwg ef.
11. Pan gosber gwatwarwr, y bydd yr ehud gallach: a phan ddysger y doeth, efe a dderbyn wybodaeth.
12. Call y mae y cyfiawn yn ystyried am dŷ yr annuwiol: ond y mae Duw yn difetha y rhai annuwiol am eu drygioni.
13. Y neb a gaeo ei glust rhag llef y tlawd, a lefain ei hunan, ac nis gwrandewir ef.
14. Rhodd yn y dirgel a dyr ddigofaint; a gwobr yn y fynwes, lid cryf.
15. Llawen gan y cyfiawn wneuthur barn: ond dinistr fydd i weithwyr anwiredd.
16. Dyn yn myned ar gyfeiliorn oddi ar ffordd deall, a orffwys yng nghynulleidfa y meirw.
17. Y neb a garo ddifyrrwch, a ddaw i dlodi: a'r neb a garo win ac olew, ni bydd gyfoethog.