16. Gwell yw ychydig gydag ofn yr Arglwydd, na thrysor mawr a thrallod gydag ef.
17. Gwell yw pryd o ddail lle byddo cariad, nag ych pasgedig a chas gydag ef.
18. Gŵr dicllon a gyffry gynnen: ond gŵr hwyrfrydig i lid a dyr ymryson.
19. Ffordd y diog sydd fel cae drain: ond ffordd yr uniawn sydd wastad.
20. Mab doeth a lawenha ei dad: ond dyn ffôl a ddiystyra ei fam.
21. Ffolineb sydd hyfryd gan yr ynfyd: ond gŵr deallus a rodia yn uniawn.
22. Ofer fydd bwriadau lle ni byddo cyngor: ac mewn amlder cynghorwyr y sicrheir hwynt.
23. Llawenydd fydd i ŵr oherwydd ymadrodd ei enau; ac O mor dda yw gair yn ei amser!
24. Ffordd y bywyd sydd fry i'r synhwyrol, i ochel uffern obry.
25. Yr Arglwydd a ddiwreiddia dŷ y beilchion: ond efe a sicrha derfyn y weddw.
26. Meddyliau yr annuwiol sydd ffiaidd gan yr Arglwydd: ond geiriau y glân ŷnt beraidd.