9. Y ffyliaid a ymhyfrydant mewn camwedd: ond ymhlith y rhai uniawn y mae ewyllys da.
10. Y galon sydd yn gwybod chwerwder ei henaid ei hun: a'r dieithr ni bydd gyfrannog o'i llawenydd hi.
11. Tŷ yr annuwiolion a ddinistrir: ond pabell y rhai uniawn a flodeua.
12. Y mae ffordd sydd uniawn yng ngolwg dyn: ond ei diwedd hi yw ffyrdd angau.
13. Ie, wrth chwerthin y bydd blin ar y galon; a diwedd y llawenydd hwnnw yw tristwch.
14. Y gwrthnysig o galon a gaiff ddigon o'i ffyrdd ei hun: ond y gŵr daionus a gilia oddi wrtho ef.
15. Yr ehud a goelia bob gair: a'r call a ddeil ar ei gamre.
16. Y doeth sydd yn ofni, ac yn cilio oddi wrth ddrygioni: ond y ffôl sydd ffrom a hyderus.
17. Gŵr dicllon a wna ffolineb: a chas yw y gŵr dichellgar.
18. Y rhai ehud a etifeddant ffolineb: ond y rhai call a goronir â gwybodaeth.
19. Y rhai drygionus a ymostyngant gerbron y daionus: a'r annuwiol ym mhyrth y cyfiawn.
20. Y tlawd a gaseir, ie, gan ei gymydog ei hun: ond llawer fydd yn caru y cyfoethog.
21. A ddirmygo ei gymydog, sydd yn pechu: ond y trugarog wrth y tlawd, gwyn ei fyd ef.
22. Onid ydyw y rhai a ddychmygant ddrwg yn cyfeiliorni? eithr trugaredd a gwirionedd a fydd i'r sawl a ddychmygant ddaioni.
23. Ym mhob llafur y mae elw: ond o eiriau gwefusau nid oes dim ond tlodi.
24. Coron y doethion yw eu cyfoeth: ond ffolineb y ffyliaid sydd ffolineb.
25. Tyst ffyddlon a weryd eneidiau: ond y twyllodrus a ddywed gelwyddau.
26. Yn ofn yr Arglwydd y mae gobaith cadarn: ac i'w blant ef y bydd noddfa.
27. Ofn yr Arglwydd yw ffynnon y bywyd, i ddianc rhag maglau angau.