4. Galwaf ar yr Arglwydd canmoladwy: felly y'm cedwir rhag fy ngelynion.
5. Canys gofidion angau a'm cylchynasant; afonydd y fall a'm dychrynasant i.
6. Doluriau uffern a'm hamgylchynasant; maglau angau a'm rhagflaenasant.
7. Yn fy nghyfyngdra y gelwais ar yr Arglwydd, ac y gwaeddais ar fy Nuw; ac efe a glybu fy llef o'i deml, a'm gwaedd a aeth i'w glustiau ef.
8. Yna y cynhyrfodd ac y crynodd y ddaear: seiliau y nefoedd a gyffroesant ac a ymsiglasant, am iddo ef ddigio.
9. Dyrchafodd mwg o'i ffroenau ef, a thân o'i enau ef a ysodd: glo a enynasant ganddo ef.
10. Efe a ogwyddodd y nefoedd, ac a ddisgynnodd; a thywyllwch oedd dan ei draed ef.
11. Marchogodd efe hefyd ar y ceriwb, ac a ehedodd: ie, efe a welwyd ar adenydd y gwynt.
12. Efe a osododd y tywyllwch yn bebyll o'i amgylch; sef casgliad y dyfroedd, a thew gymylau yr awyr.
13. Gan y disgleirdeb ger ei fron ef yr enynnodd y marwor tanllyd.
14. Yr Arglwydd a daranodd o'r nefoedd, a'r Goruchaf a roddes ei lef.
15. Ac efe a anfonodd ei saethau, ac a'u gwasgarodd hwynt; mellt, ac a'u drylliodd hwynt.
16. Gwaelodion y môr a ymddangosodd, a seiliau y byd a ddinoethwyd, gan gerydd yr Arglwydd, a chan chwythad anadl ei ffroenau ef.
17. Efe a anfonodd oddi uchod: cymerodd fi; tynnodd fi o ddyfroedd lawer.
18. Gwaredodd fi rhag fy ngelyn cadarn, a rhag fy nghaseion; am eu bod yn drech na mi.
19. Achubasant fy mlaen yn nydd fy ngofid: ond yr Arglwydd oedd gynhaliad i mi.
20. Efe a'm dug i ehangder: efe a'm gwaredodd i, am iddo ymhoffi ynof.
21. Yr Arglwydd a'm gobrwyodd yn ôl fy nghyfiawnder: yn ôl glendid fy nwylo y talodd efe i mi.