11. Ug sa panahon nga dakpon kamo nila ug dad-on ngadto sa hukmanan, ayaw kamo kabalaka kon unsay angay ninyong isulti nianang higayona. Isulti ang angay ninyong isulti kay ang mga pulong nga inyong isulti dili man inyo kondili iya sa Espiritu Santo.
12. Itugyan sa mga tawo ang ilang kaugalingong mga igsoon aron patyon ug mao usab kini ang buhaton sa mga amahan ngadto sa ilang mga anak. Makigbatok usab ang mga anak sa ilang mga ginikanan ug ipapatay sila sa mga anak.
13. Ug dumtan kamo sa tanang tawo tungod kanako apan kadtong molahutay hangtod sa kataposan maluwas gayod.
14. “Unya makita ninyo ang ‘Makalilisang nga Talan-awon’ nga magtindog sa dapit nga dili angay niini. (Ang magbasa maoy mag-igo pagsabot niini.) Kadtong atua sa Judea kinahanglang modangop sa kabukiran.
15. Kadtong atua sa atop sa balay kinahanglang dili mag-usik ug panahon sa pagkanaog aron pagkuha sa bisan unsa gikan sa iyang balay.
16. Ug kadtong atua sa uma kinahanglan nga dili mopauli sa balay aron pagkuha sa iyang kupo.
17. Alaot gayod ang mga mabdos ug ang may mga masuso niadtong mga adlawa!
18. Busa pag-ampo kamo sa Dios nga dili kini mahitabo sa tingtugnaw.
19. Kay ang kasakitan niadtong mga adlawa labi pang makalilisang kay sa bisan unsa nga nahiagoman sa kalibotan sukad kini buhata sa Dios hangtod karon ug dili na gayod hitupngan bisan kanus-a.
20. Apan tungod sa iyang pinili nga katawhan gipakubsan sa Ginoo ang gidaghanon sa mga adlaw niadtong panahona kay kon wala pa, wala untay mahibiling buhi.
21. “Unya kon may moingon kaninyo, ‘Tan-awa, dia diri ang Mesiyas!’ o, ‘Tan-awa, atua siya didto!’ ayaw kamo pagtuo kaniya.
22. May motungha nga mga mini nga Mesiyas ug mga mini nga propeta. Maghimo silag mga milagro ug mga katingalahan aron kon mahimo, pasalaagon usab nila ang mga pinili sa Dios.
23. Busa pagbantay kamo! Gipasidan-an ko na kamo niining tanan.
24. “Sa panahon unya human sa kasakitan, mongitngit ang adlaw ug dili na modan-ag ang bulan.
25. Mangahulog gikan sa langit ang mga bituon ug matay-og ang tibuok kalangitan.
26. Unya diha sa mga panganod makita ang Anak sa Tawo nga moabot nga may gahom ug himaya.