1. Unya mikuha si Samuel ug usa ka gamay nga tibod sa lana ug gibubo niya ang sulod niini sa ulo ni Saul. Gihagkan niya si Saul ug giingnan, “Gidihogan ka sa Ginoo aron mahimong pangulo sa iyang katawhan, ang Israel. Maghari ka sa katawhan sa Ginoo ug luwason mo sila sa mga kaaway nga naglibot kanila. Ug mao kini ang timaan nga ang Ginoo maoy nagdihog kanimo ug naghimo kanimong pangulo sa iyang katawhan:
2. inigbiya mo kanako karong adlawa, makasugat kag duha ka tawo duol sa lubong ni Raquel didto sa Zelza sa yuta ni Benjamin. Sultihan ka nila, ‘Nakit-an na ang mga asno nga imong gipangita ug ikaw na ang gikabalak-an sa imong amahan. Nagsigi siyag pangutana kon unsa nay nahitabo kanimo.’
3. Inig-abot nimo sa unahan sa sagradong kahoy didto sa Tabor, sugaton kag tulo ka tawo nga nagpadulong sa Betel aron pagsimba sa Dios. Usa kanila may dalang tulo ka nating kanding, ang ikaduha tulo ka buok pan ug ang ikatulo magdalag bino nga gisulod ug sudlanan nga panit.
4. Himamaton ka nila ug hatagan kag duha ka buok pan. Dawata kini
5. unya lakaw ngadto sa Gibeat-Elohim diin nagkampo ang mga Filistihanon. Inigsulod mo sa siyudad, tagboon ka sa usa ka pundok sa mga propeta nga gikan sa halaran didto sa bungtod. May dala silang alpa, tambor, plawta ug lira ug sadya sila nga manayaw ug maninggit.