51. si Bukki nga anak ni Abisua, si Uzi nga anak ni Bukki, si Saraias nga anak ni Uzi,
52. si Meraiot nga anak ni Saraias, si Amarias nga anak ni Meraiot, si Ahitub nga anak ni Amarias,
53. si Sadok nga anak ni Ahitub ug si Ahimaas nga anak ni Sadok.
54. Ang mga dapit nga gipuy-an sa mga kaliwat ni Aaron sa banay ni Kohat mao kini: Gihatag ngadto kanila ang unang bahin sa yuta nga gitagana alang sa mga Levita.
55. Naglakip kini sa Hebron sa yuta sa Juda ug ang kasikbit nga mga pasibsibinan
56. apan ang kaumahan sa siyudad ug ang mga balangay niini gihatag kang Caleb nga anak ni Jefone.
57-59. Gihatag usab ngadto sa mga kaliwat ni Aaron ang mga siyudad nga dalangpanan: ang Hebron ug ang Libna lakip ang mga pasibsibanan niini, ang Jeter, Estemo, Helon, Debir, Asan, Betsemes ug ang tanang pasibsibanan niini.
60. Sa banay ni Benjamin, gihatag kanila ang Geba lakip ang mga pasibsibanan niini ingon man ang Alemet ug ang Anatot lakip ang mga pasibsibanan niini. Napulog-tulo ka siyudad ang gihatag kanila.
61. Ngadto sa ubang kaliwat ni Kohat gihatag pinaagi sa ripa ang napulo ka siyudad gikan sa katunga sa banay ni Manases.
62. Ngadto sa mga kaliwat ni Gerson gihatag ang 13 ka siyudad gikan sa mga banay ni Isacar, ni Aser, ni Neftali ug ang Manases sa Basan.
63. Ngadto sa mga kaliwat ni Merari gihatag ang 12 ka siyudad gikan sa mga banay ni Ruben, ni Gad ug ni Zabulon.
64. Busa gihatagan sa katawhan sa Israel ang mga kaliwat ni Levi ug mga siyudad lakip ang mga pasibsibanan niini.
65. Kining gipanghinganlan nga mga siyudad gikan sa mga banay ni Juda, ni Simeon ug ni Benjamin gipanghatag usab ngadto sa mga Levita pinaagi sa ripa.
66. Ang pipila sa mga kaliwat ni Kohat gihatagag mga siyudad gikan sa banay ni Efraim.
67-69. Gihatagan silag mga siyudad nga dalangpanan: ang Siquem sa kabungtoran sa Efraim, ang Geser, Jokmeam, Bet Horon, Ayalon ug ang Gatrimon lakip ang mga pasibsibanan niini.
70. Gikan sa katunga sa banay ni Manases gihatag ang Aner ug ang Bileam lakip ang mga pasibsibanan niini ug alang sa ubang mga pamilya nga kaliwat ni Kohat.
71. Ngadto sa mga kaliwat ni Gerson gihatag sa katunga sa banay ni Manases ang Golan sa Basan ug ang Astarte lakip ang mga pasibsibanan niini.
72-73. Gikan sa banay ni Isacar gihatag ang Cades, ang Daberat, ang Ramot ug ang Anem lakip ang mga pasibsibanan niini.