1. EN in die elfde jaar, op die eerste van die maand, het die woord van die Here tot my gekom en gesê:
2. Mensekind, omdat Tirus oor Jerusalem geroep het: Ha, ha! die poort van die volke is gebreek, dit is na my toe gedraai; ék sal vol word, dit is verwoes —
3. daarom, so sê die Here Here: Kyk, Ek het dit teen jou, o Tirus! en Ek laat baie nasies teen jou optrek soos die see sy golwe laat optrek.
4. Húlle sal die mure van Tirus verwoes en sy torings afbreek; ja, Ek sal sy puin van hom af wegvee en hom ’n kaal rots maak.
5. Hy sal binne-in die see ’n droogmaakplek van nette wees; want Ek het dit gesê, spreek die Here Here; en hy sal ’n buit vir die nasies wees.
6. En sy dogters wat op die land is, sal met die swaard gedood word; en hulle sal weet dat Ek die Here is.